BR LA UNION – Nangipaulog ti Bureau of Fire Protection (BFP) National Headquarters iti memorandum mainaig iti nainget a panagsagana iti obserbasyon ti Semana Santa ken Lakbay Alalay 2026 ken panangipatungpal dagiti precautionary measures.
Segun kenni FCINSP Edwin Orejudos, agdama a fire marshal ti BFP- San Fernando City La Union, nakasaganan ti komprehensibo a plano para iti nadumaduma nga aktibidad, a mang-sigurado ti kinatalged ti publiko nangruna dagiti sumangbay a bisita, bakasyunista, ken turista.
Karaman ditoy ti pannakaipatungpal ti heightened alert status mangrugi inton Marso 29 agingga Abril 5, 2026 kaipapanan a naka-alerto amin a personnel ken nakasagana a sumungbat a dagus iti anyaman nga insidente.
Nangisayangkat metten ti ahensiya iti coordination meeting iti Local Government Unit (LGU), partikular iti City Disaster Risk Reduction and Management Office (CDRRMO) Council, tapno mapapigsa ti koordinasyon dagiti ahensiya, kangrunaanna para iti napartak a panagresponde iti panawen ti emerhensiya.
Iti biang ti BFP San Fernando, kangrunaan a responsibilidadda ti panangipaay iti emergency medical ken fire response services.
Nakasagana iti ambulance team ken Ambulance Medical Service (AMS) nga agserbi a first responder kadagiti insidente ti uram ken dadduma pay a didigra.
Mangi-deploy ti Ambulance Medical Service kadagiti Fast and First Aid Service Teams iti igid dagiti national highway ken dadduma pay a populated areas tapno mangipaay iti dagus a first aid kadagiti agkasapulan.
Malaksid iti dayta, maideploy met dagiti Lakbay Alalay teams a mangipamaysa iti panangipaay iti direksion, ken dagus a tulong kadagiti motorista ken biyahero, nangruna kadagiti kangrunaan a kalsada ken destinasyon dagiti turista.
