BR LA UNION – Suportado ti Maritime Industry Authority (MARINA) iti inisyatiba ti Department of Energy (DOE) a mangbukel ti science-based safety standards para iti panagibiyahe ti electric ken hybrid vehicles kadagiti domestic passenger vessel.
Segun iti MARINA, makitinnulong daytoy iti DOE, Bureau of Fire Protection (BFP) ken PCG tapno marepaso ti agdama a safety protocols ken mangituding kadagiti requirement iti panagkarga ti electric ken hybrid vehicles kadagiti barko.
Nupay kasta, inlawlawag ti MARINA nga awan pay ti pinal a findings a mangibagbaga a ti electric vehicle a naipadamag a nailugan iti MV June Aster ti nakaigapwan ti uram.
Siniguro pay ti MARINA nga agtultuloy a nakatutok da iti safety ken seaworthiness dagiti barko, kagiddan ti pananglagip ti National Maritime Week.
Segun kenni MARINA Planning and Policy Service Director Precila Jara, agtultuloy ti panangidur-as da iti proseso ti panagamiris iti seaworthiness dagiti vessel agsipudta napateg a masiguro daytoy sakbay a mapalubosan nga aglayag dagiti barko.
Imbaga ni Jara nga addaan da ti checklist ken mas tutukan da dagiti aspeto ti operasyon ken kinatalged dagiti barko tapno masiguro a sumursurot da iti maritime safety requirements.
