Pinatibker manen iti gobierno ti Japan ti sapata da a suportaran ti Pilipinas kadagiti panawen ti didigra ken emerhensiya.
Kinuna iti Embahada ti Japan ditoy Pilipinas a papigsaen da ti koordinasyon kadagiti panagsungbat maipapan ti emerhensiya ken palawaen ti kooperasyon kadagiti programa maipanggep ti aglawlaw.
Dinakamat pay ti Embahada ti panagsungbat ti Tokyo iti kiddaw ti Maynila para iti teknikal a tulong seknan ti operasyon iti panagsebseb ti uram, panagbantay ti kaledad ti angin, ken panangimaton iti basura, kalpasan iti nakaam-ames nga uram sadiay Navotas Sanitary Landfill Facility (NSLF) idi bulan ti Abril.
Nangipatulod metten iti gobierno ti Japan ken Japan International Cooperation Agency (JICA) kadagiti 6-member expert team manipud Japan Disaster Relief (JDR) Operations tapno tumulong iti naan-anay a panangpasardeng ti uram iti landfill ken maisubli iti naannayas nga aglawlaw kadagiti apektado a lugar.
Ita laeng Mayo ket inwaragawag ni Presidente Ferdinand “Bongbong” Marcos Jr. a naan-anayen a nataming dagiti dadakkel nga apoy iti landfill ken impeksa na iti panagyaman idiay Japan para ti inbinglay da a teknikal a tulong.
