Pinermaan ti bicameral conference committee idi kalman iti Committee Report a maitunos kadagiti probision ti House Bill No. 4058 wenno General Appropriations Bill (GAB) para inton 2026.
Ti na-enroll a singasing linteg ket naglaun ti nasurok-kumurang ₱6.7 trillion para iti gastusen ti gobierno.
Indauluan ni House Appropriations Committee Chairperson ken Nueva Ecija Rep. Mikaela Suansing iti delegasion ti Kamara iti panagperma ti report, kadua da Representative Jose Alvarez, Javier Miguel Benitez, Albert Garcia, Marcelino Libanan, Jurdin Jesus Romualdo, ken Allan Ty.
Segun kenni Senate Finance Committee Chair Sen. Win Gatchalian, dimmalan ti nainget a proseso iti singasing-linteg a buklen ti nasurok-kumurang 4,300 a panid, pakairamanan dagiti annex a naibasa ti lima a daras.
Naipablaak met iti dokumento kadagiti transparency portals ti Senado ken Kamara kalpasan iti ratipikasion.
Nakatuding a ratipikaran ti House of Representatives ken Senado iti bicam report kadagiti plenary session-da inton malem sakbay a maipasa kenni Presidente Ferdinand Marcos Jr. para iti pormal a panag-aprobar.
Manamnama met a pirmaan ti Presidente iti 2026 national budget iti umuna a lawas ti Enero 2026.#
