Pinaglikudan ti Department of Agriculture a ‘political move’ ti programa ti gobierno a mangilako iti bagas iti P29 kada kilo, sumagmamano a lawas sakbay ti naituding nga State of the Nation Address (SONA) ti PBBM.
Segun kenni Agriculture Assistant Secretary ken spokesperson Arnel de Mesa, nabayagen a plano ti gobierno ti panaglako kadagiti kastoy a klase ti bagas.
Kinapudnona, kinunana, uray sakbay ti pannakadutok ni Agriculture Secretary Francisco Tiu Laurel Jr. nabayagen a plano ti gobierno kas sungbat iti immun-una a pammilin ti PBBM a maibaba ti presio ti bagas.
Segun kenni de Mesa, nailasin metten dagiti paggapuan ti bagas wenno supplier ti nalaka a bagas a mailako kadagiti nakurapay a sektor.
Malaksid iti bagas ti National Food Authority, kinunana, adda pay ti kontrata a panagtalon ti National Irrigation Administration nga addaan garantia a makaipaay iti agingga iti 121,000 a metriko tonelada a bagas.
Malaksid iti daytoy, kinunana, agtultuloy ti panagbirok ti gobierno iti dadduma pay a pamatian.
Immuna a inyuswat ti nasao a programa kalpasan nga inaprobaran ti NFA council ti pannakailako dagiti daan nga stock ti bagas ti NFA.
Gapu iti limitado a suplay, limitado met dagiti benepisiario, kas kadagiti senior citizens, PWD, benepisiario ti Pantawid Pamilyang Pilipino Program, ken single parents.
