LA UNION – Rugian ti Department of Agriculture (DA) ti aglako iti nalaka a bagas iti nagduduma a lugar mangrugi inton Agosto 2024.
Immuna a nangrugi ti panaglako iti P29/kilo a bagas iti sumagmamano a Kadiwa outlets iti pagilian agingga nakadanon iti 13 nga outlets iti National Capital Region (NCR) ken Central Luzon.
Segun ken ni Agriculture Secretary Francisco Tiu Laurel Jr., mangrugi inton Agosto 1, manayonan ti sangapulo pay nga outlet a mangilako iti nalaka a klase ti bagas.
Malaksid iti dayta add pay tallo a probinsia a mabalin a mainayon kadagiti listaan.
Segun iti sekretario, in-inut nga iyam-ammo ti gobierno ti nalaka a bagas tapno magunggonaan ti amin a kualipikado a gumatang.
Impasigurado pay ti sekretario nga agtalinaed nga umdas ti suplay dagitoy kadagiti baro nga outlet a malukatan.
