BR LA UNION –Umaboten iti nasurok 7,600 ti bilang dagiti Overseas Filipino Workers (OFW) ken pamilya da ti natalged a nakaawid ditoy Pilipinas iti tengnga ti agtultuloy a tensyon idiay Middle East, kasaruno ti simmangpet a baro a batch dagiti Pilipino manipud Kuwait idi Biyernes.
Segun iti Department of Migrant Workers (DMW), aganay 196 nga OFW manipud Kuwait iti ballaygi a nagawid ditoy pagilian lugan ti maysa a commercial flight.
Ti nasao nga addang ket paset ti mas nairutan a repatriation efforts ti gobyerno tapno maiyadayu iti peligro dagiti Pilipino nga apektado ti riribok iti rehiyon.
Sinabat met dagiti mangibagbagi ti ahensya dagiti nagawid nga umili a Pilipino.
Siniguro ti DMW a ti tunggal maysa kadakuada ket naipaayan ti tulong pinansyal, libre a transportasyon a nagawid kadagiti probinsya, ken temporaryo a pagdagusan.
Maibasar iti kauddian a datus ti DMW, manipud Marso 5 agingga Abril 24 ita a tawen, umabot ti pakabuklan a 7,600 nga OFW ken dependents da ti naiyakar a nagsubli ditoy Pilipinas.
Manipud iti pakabuklan s bilang, aganay 7,000 nga indibidwal iti direkta a nagnumar iti government-funded repatriation.
Buklen daytoy iti nasurok 5,600 a mangmangged ken nasurok 1,300 nga dependents wenno kabagyan dagitoy.
Agtultuloy a nakatutok ti DMW ken Department of Foreign Affairs (DFA) iti sitwasyon idiay Middle East tapno umasiste iti dadduma pay a Pilipinpo a kayat na ti agawid ditoy pagilian.
