Naikkat iti serbisyo ti maysa a jail guard ti New Bilibid Prison, siudad ti Muntinlupa kalpasan a natiliwan iti illegal drugs babaen ti buy bust operation ti Philippine Drug Enforcement Agency sadiay Parañaque City.
Nabigbig ti natiliw a jail guard a ni Corrections Officer 1 Paul Patrick Toledo a naidestino iti maximum security compound ti Bilibid.
Natiliw met dagiti kakaduana a maysa a security guard nga agnagan Reynold Teodoro ken truck driver a ni Romeo Guerrero.
Nakumpiskar manipud kadagiti suspek ti 10 a kilo ti mapapati a shabu nga addaan iti street value a P68 million, maysa a paltog a nagkarga iti 8 a bala ken dadduma pay a banag, kuarta ken lugan.
Segun kenni Bureau of Corrections (BuCor) Director General Gregorio Pio Catapang Jr., ad-adda a napapigsa ti kampania ti ahensia a mangibutaktak kadagiti madi ti aramid na ken adda pakainaigan da iti iligal nga aktibidad.
Kinuna pay ti hepe ti BuCor a nasinged ti pannakitinnulongda iti PDEA tapno masigurado nga amin a personnel-da ken ti panagbisita dagiti balud a natiliw gapu iti panagipuslitda iti illegal a droga iti uneg ti Bilibid ket ma-turnover para iti katupag nga imbestigasion ken disposision.
