BR LA UNION – Inaklon ti Bureau of Internal Revenue (BIR) a saanna a mamon-monitor nu agbay-bayad ti umno a buwis dagiti social media personalities a kumitkita manipud iti content iti digital platforms.
Daytoy ti naibutaktak iti maikadwa a panagdengngeg ti tri-Committee idiay Kamara ita nga aldaw seknan iti isyu ti fake news ken disinformation.
Segun kenni Atty. Tobias Arcilla nga agbas-basar da laeng iti voluntary declaration dagiti social media personalities iti income da manipud iti content.
Kinuna na a ti ar-aramiden ti BIR ket random audit investigation partikular kadagiti indibidwal a maibil-bilang a “high-risk”.
Inlawlawag ni Arcilla, a maipas-pasidong iti cross-check iti idek-deklara dagiti vloggers manipud iti foreign tax jurisdiction, nga addaan da ti treaties wenno katulagan.
Aminado pay ti opisyal nga iti agdama a tax laws, saan da a mabalin a basta imbestigaran dagiti taxpayers.
Mamati met ni House Deputy Minority Leader France Castro nga adda loophole ti linteg a rumbeng a masungbatan ken saan a rumbeng nga aguray ti BIR ti voluntary declaration.
Kasaruno daytoy, imbilin ni Acting Chairman Romeo Acop iti BIR nga agsumite ti datos nu manu a social media influencers iti nasingir dan ti buwis.
