Agtultuloy a mabirbirok ti black box ti nagsuwek nga Air India plane sadiay Ahmedabad, India. Adda metten iti crash site dagiti forensic experts tapno makagun-od kadagiti ebidensiya nga adda pakainaigan na ti aksidente.
Idi rabii ti Huebes ket inyanunsyo ti India ti panangisayangkat ti pormal nga imbestigasyon iti Air India crash nga indauloan ti Aircraft Accident Investigation Bureau. Nangipatulod met ti Estados Unidos ken United Kingdom kadagiti expert team da tapno umalalay.
Kabayatanna, personal met a nagturong da Indian Prime Minister Narendra Modi iti nagsuwekan ti eroplano sadiay Ahmedabad ken binisita na ti kakaisuna a nakalasat ti trahediya – maysa a British national a ni Vishwashkumar Ramesh – nga agdama nga agpapaimbag ken blangko paylaeng a saan a makapapati iti milagro a a pannakalasat na iti aksidente.
Isuna laeng ti nabiag manipud kadagiti 242 a sakay ti eroplano, sumagmamano laeng a segundo idi naka-takeoff sakbay a nagsuwek iti maysa a residential area.
Maibasar iti Air India, agingga 169 Indian nationals, 53 Britons, 7 Portuguese nationals, ken maysa a Canadian ti sakay ti eroplano.
Pinasingkedan met ti senior health official ti Ahmedabad a walo nga tattao ti natay ti nagsuwekan na, uppat ket medical students bayat a dagiti uppat pay ker kaanakan da metlaeng nga agnanaed ti maysa nga hostel.
Kabayatanna, nangipaay met dagiti pamilya dagiti biktima kadagiti DNA samples tapno makatulong iti panangdakamat ti pakabigbigan kadagiti pimmusay.
