LA UNION – Nabara a pinasangbay dagiti nasurok 300 a catholic devotees, agraman dagiti kameng ti simbaan katolika ditoy syudad ti San Fernando, a nakipaset iti prusisyon ti Black Nazarene itay pasado alas 5:00 ti agsapa, manipud monumento wenno Tomb of the Unknown Soldier, ken naiturong ti imahe iti Saint William The Hermit Cathedral.
Iti nasao nga imahe ni Apo Lakay ket naggapo idiay Quiapo Manila ken agtalinaed ditoy syudad ti San Fernando iti makalawas, wenno Manipud Nobyembre 26 agingga Disyembre 2, 2018.
Kalpasan ti prusisyon, sumaruno a maisayangkat ti misa iti nadakamat met laeng a cathedral.
Naamwan ti Bombo Radyo La Union a kas paset dagiti naisagana nga aktibidad iti panagtalinaed ti Black Nazerene ditoy syudad ket maisayangkat iti mamitlo a daras a panagmisa iti simbaan iti inaldaw, maysa iti bigat, aldaw, ken malem.
Kabayatanna, inton Nobyembre 30, aldaw ti Biyernes ket maisayangkat ti Translacion wenno pannakai-libut ti Black Nazarene iti intero a syudad.
Maragsakan met unay dagiti deboto iti panagturong ditoy syudad ti Nangisit a Nazareno.
