Nagbalin a nabara iti innagaw ti TNT ken Magnolia para iti serbisyo ti 7-foot-3 NBA veteran a ni Bol Bol iti agtultuloy a PBA Commissioner’s Cup.
Segun ti report, ginandat ti Magnolia nga alaen ni Bol ngem naiturong isuna iti TNT kas import. Nupay addaan ti salary cap a nasurok-kumurang $25,000 tunggal bulan para kadagiti imports, mabalin pay daytoy a ngumato gapu ti bonuses ken perks.
Naipadamag a dimmanon ti $90,000 wenno katupag ti ₱5.4 million tunggal bulan iti diaya ti Magnolia, bayat a mapatta-patta a $120,000 wenno nasurok kumurang ₱7.3 million iti naawat ni Bol iti TNT, nupay saan pay daytoy a nakumpirma.
Iggem ti TNT iti 6-4 record ken kasapulan pay a mangabak iti maudi a dua nga ay-ayam tapno maaddaan ti tyansa iti Top 4 ken twice-to-beat advantage iti quarterfinals.###
