La Union – Madama a mangisaysayangkat ti imbestigasyon ti pulisya iti napasamak a pammaltog iti grupo ni sigud a Congressman Eufranio “Franny” Eriguel kabayatan na nga adda iti meeting de avance idiay Barangay Capas, iti ili ti Agoo, La Union dakong alas 6:30 ti rabii.
Iti impormasyon a nakalap ti Bombo Radyo La Union, pinalpaltogan dagiti saan pay nga ammo a bilang dagiti suspek iti grupo ti sigud a Kongresista iti nasao nga lugar.
Malaksid kenni sigud a Congressman Eriguel, dua kadagiti kakaduana ti natay iti pammaltog.
Umabot met iti walo pay ti nasugatan iti nasao nga insidente.
Makunkuna a nagasat a nakalasat manipud iti pammaltog iti asawana a ni Congresswoman Sandra Eriguel gaputa saan daytoy nga rimmuar iti lugan kasaruno ti dagus a pannakailibas kenkuana dagiti security escort.
Kabayatan na, segun iti saanen a nagpabigbig a police officer makunkuna a bin-eg nga nakabonete dagiti suspek.
Nakaawag pay ti Congresswoman iti pulisya kabayatan iti pinnaltogan.
Iti agdama, dupudop dagiti taga suporta ti sigud a Kongresista iti La Union Medical Center ken agpadpadaanan iti development ti kaso.
