LA UNION — Agtutuon a kaso ti isagsagana iti pulisya kontra iti kapitan ti Barangay San Jose, Rosario, La Union gapu iti maipagarup a panagikotna iti iligal a droga ken bala.
Nabigbig ti 62-anyos a suspek a ni Barangay Chairman Ruben Genetiano.
Naammuan iti Bombo Radyo manipud ti Rosario Police Station, ti nasao nga opisyal ket karaman iti narco-list ken siguden a simmuno babaen ti “Oplan Tokhang”.
Iti naisayangkat a search operation ti pulisya ket nakompiskar manipud iti uneg ti balay iti tallo a sachet ti maatap a marijuana, karaman ti maysa a magazine nga addaan iti dua a bala ti cal .45.
Kaso a panaglabsing iti Comprehensive on Dangerous Drugs Act ken illegal posession of ammunitions ti reklamo a mabalin a sanguen ti kapitan idiay piskalya.
Kabayatanna, gapu iti pannakatiliw ti nasao a punong barangay ket naminsan manen a nagpalagip ti pulisya a pagtalinaeden a drug free iti ili ti Rosario nga immunan nga idineklara ti Philippine Drug Enforcement Agency (PDEA).
Kabayatanna, kinumpirma met ni PDEA Regional Office-1 Information Officer Bismark Bengwayan a saan a basta maibabawi kas drug free iti nasao nga ili gapu laeng ti nasao a pannakaaresto ti suspek.
