Inallukoy ti liderato ti BSP iti nalawlawa a panagusar ti Philippine National ID iti panaglukat ti account kadagiti bangko.
Iti naangay a National ID Forum ket kenuna ti BSP a nasaysayaat nga usaren daytoy iti panaglukat ti accounts kadagiti dadduma pay a financial institution iti pagilian.
Agtultuloy nga idurduron ti BSP a pagmaymaysaen dagiti wagas para iti integrasyon ti pisikal ken digital a bersyon ti National ID partikular iti proseso ti beripikasyon dagiti kilyente nga ag-avail ti serbisyo dagiti bangko.
Kumpyansa ni BSP Governor Remolona, dakkel iti potensyal ti National ID iti financial inclusion, ken umad-ado iti benepisyo kagiddan ti lumawlawa a panagusar iti daytoy.
Karaman kadagiti rekomendasyon iti nalawlawa a panagusar ti NIDAS ti PSA para iti real-time a beripikasyon ti pakabigbigan babaen iti biometrics ken demographic data manipud kadagiti nadumaduma a format ti National ID.
Iti nasao a forum ket dinar-ayan dagiti mangibagbagi manipud iti PSA, DICT, NPC, Office of the Special Assistant to the President for Investment and Economic Affairs, World Bank, Korea Credit Information Services, ken dagiti dadduma pay a regulated financial institutions.#
