Inaresto dagiti operatiba ti Bureau of Immigration (BI) ti tallo a Chinese fugitives a wanted ditoy Pilipinas ken China gapu iti agsasaruno a mapapati a kriminal nga aktibidad.
Nabigbig ni Jun Chen, 28; Hongru Zhang, agtawen iti 26; ken Hao Zhen, 27, a suspek nga natiliw dagiti operatiba ti BI-Fugitive Search Unit (FSU) idi Agosto 13 sadiay Barangay Tambo, Parañaque City.
Sumangsango dagitoy iti criminal charges gapu iti panagtakaw, grave coercion, illegal detention, gun possession, ken illegal drug trading nga inpila ti polis ti siudad mainaig iti mapapati a kidnapping ken illegal detention ti maysa a biktima a Vietnamese.
Segun kenni Bureau of Immigration-Fugitive Search Unit acting chief Rendel Ryan Sy, dua kadagiti tallo a Chinese nationals ti subject ti arrest warrant nga inruar ti public security bureau sadiay Jinjiang, China idinto nga overstaying alien ti sabali.
Undocumented aliens dagitoy agsipud ta sigud a kinansela ti pasaporte dan ti gobierno ti China.
Nakapasidong dagiti suspek iti temporary custody ti polis ti Parañaque bayat a maur-uray ti pannakarisut dagiti criminal cases da.
