BR LA UNION – Immandar ni Caloocan City Mayor Dale Gonzalo “Along” Malapitan iti panagirut ti seguridad kadagiti pagadalan ti nasao a siyudad kasaruno ti kidnapping incident idiay Maypajo, Caloocan.
Binilin ti mayor iti nabukel nga Aksyon at Malasakit Task Force nangruna iti pulisiya a papigsaen ti panagbantay kadagiti pagadalan nangruna iti oras a panagserrek ken panagawid dagiti estudyante.
Iti maysa nga statement, imbaga ti mayor a dagus na nga immandar ti imbestigasyon iti insidente a gandat a panang-kidnap iti dua nga ubbing.
Segun iti Caloocan City Police Station (CCPS), iti suspek ket residente ti Sta. Ana, Manila ken sumangsango ti kaso nga attempted kidnapping.
Ikonkonsidera da iti kaso nga isolated incident.
Imbutaktak dagiti otoridad a sumagmamano nga aldawen a saan a mangmangan ti suspek ken immuna a naibalud idi Disyembre gaputi drug-related charges.
Kabayatanna, siniguro ti mayor kadagiti residente a nakasagana dagiti barangay ken police personnel nga agresponde iti anyaman a pangta iti seguridad ti siyudad.
