Pormal nga iyusuat ti City Government of San Fernando iti programa a Car-Free Weekends @CSF (Wellness Weekends) a panggepna a paregtaen ti nasalsalun-at, ad-adda nga aktibo, ken ad-adda a makaay-ayo iti aglawlaw nga estilo ti panagbiag para kadagiti umili ken bisita.
Mangrugi inton Mayo 9 agingga iti Hulio 26, 2026, temporario a maiserra ti lugar iti aglawlaw ti City Plaza kadagiti de motor a lugan iti tunggal Sabado ken Domingo tapno adda lugar dagiti nadumaduma a pisikal ken makaay-ayo iti pamilia.
Maipatungpal daytoy iti tunggal Sabado manipud alas-kuatro ti malem agingga alas-dyis ti rabii ken tunggal Domingo manipud alas-singko ti parbangon agingga alas-dyis ti bigat.
Panggep ti programa a mangipaay iti natalged ken silulukat nga espasio para iti pannagna, panagbisikleta, panag-jogging, ken dadduma pay nga aktibidad iti ruar, bayat a maksayan ti polusion ken maitandudo ti salun-at ken pagimbagan ti komunidad.
Segun ti gobierno-siudad, maipatungpal dagiti nainget a pagannurotan iti uneg ti naituding a Car-Free Zone. Karaman ditoy ti pannakaiparit ti amin a motorized vehicles, pannakamantener ti urnos ken kinadalus babaen ti Clean As You Go (CLAYGO), ken nainget a pannakaiparit ti panagsigarilio ken panag-vape. Mapalubos dagiti taraken no la ketdi naigalut wenno nakatali iti amin a gundaway.
Maparegta pay ti publiko a mangsurot iti naituding a site map para kadagiti aktibidad ken pannakaserra ti kalsada, kasta met ti panagusar kadagiti alternatibo a transportasion kas iti pannagna, panagbisikleta, scooter, ken pampubliko a transportasion.
Mainayon pay, mabalakadan dagiti agturong sadiay nga itugotda dagiti kasapulan a banag kas iti ekstra a kawes, refillable water bottle, alikamen ti panagehersisio, sunscreen, picnic mat, ken ay-ayam iti ruar tapno naan-anay a matagiragsakda dagiti naisagana nga aktibidad.
Mangnamnama ti lokal a gobierno a ti nasao nga inisiatiba ket agserbi a plataporma tapno mapatibker ti singgalut ti komunidad, maisaknap ti pannakaammo iti salun-at, ken maitandudo ti nasalun-at ken naberberde a siudad para iti amin. (Report by Bombo Ericka)
Photo Courtesy: City Government of San Fernando, La Union
