Limmubog ti maysa a Liberian-flagged cargo ship a naglaon kadagiti delikado a kemikal idiay kabaybayan ti Kerala, India, segun iti Indian Navy ita a Dominggo.
Sakay iti nasao a barko dagiti 24 a tripulante manipud kadagiti pagilian ti Georgia, Russia, Ukraine, ken Pilipinas a balligi met a naisalakan dagiti otoridad.
Napagammoan a ti MSC ELSA 3 nga agatiddog ti 184 a metro ket naglayag manipud Vizhinjam nga agturong idiay Kochi idi nagipatulod daitoy iti distress signal idi aldaw ti Sabado.
Nabirukan ti barko babaen ti eroplano ti Indian Navy sadiay 38 nautical miles southwest iti Kochi a tumtumpaw iti delikado a posisyon.
Kinuna ti Indian Ministry of defense a 640 containers ti sakay ti barko, karaman dagiti 13 hazardous containers ken 12 a naglaon met iti calcium carbide —maysa a kemikal a maar-aramat ti panagaramid ti abono ken landok.
Karga pay ti limmubog a barko ti agingga 370 toneladang a gasolina ken langis ngem segun iti coast guard, awan ti aniaman a napaliiw nga oil spill iti lugar.
Kabayatanna, nakasagana met ti Indian Coast Guard para ti posible a pollution response kontra ti pangta iti oil spill iti kabaybayan ti Kerala.
