Nakaituding nga agtraining iti pagilian a Japan ni Filipino Olympic Gold medalist Carlos Yulo ken sumagmamano a gymnast ti pagilian.
Iti nasao a panagsanay ket kas panagsagana ti pagilian para iti World Championship a maangay idiay Jakarta, Indonesia manipud Oktubre 19 agingana 25.
Kalkalpas laeng a nakisalip ni Yulo iti Asian Championships idiay South Korea no sadino nakaibulsa daitoy ti maisa a gold medal ken tallo a bronze medal.
Sumagmamano kadagiti makadua ni Yulo ket isuda Ace de Leon, Miguel Besana ken John Ivan Cruz kasta met iti ub-ubing a kabsat na a ni Karl Eldrew.
Immuna iti daitoy ket agarop 10 a bulan a naginana ni Yulo manipud iti panagballigi na iti Paris Olympics no sadino impasigurado na a magun-od na iti balligi kadagiti torneo a pakasalipan na.
