BR LA UNION – Inyanunsiyo ti China iti panagibales da iti US kalpasan a patawan ti 10 percent a taripa.
Segun iti China, ipatawda ti 15 a porsiento a taripa kadagiti produkto a coal wenno karbon ken liquefied natural gas, kasta met ti 10 a porsiento a taripa iti krudo, makinaria ti agrikultura ken dadakkel a makina ti lugan manipud iti US.
Mangrugi inton Pebrero 10 ti nadakamat a pannakaipakat ti baro a taripa.
Ibilang pay laeng ti China a nalag-an ti panagibalesda no idilig iti inaramid ti US, a nangipaulog iti 10 a porsiento a taripa kadagiti amin a produkto.
Kinumpirma pay ti White House a nakatuding nga agsarita da US President Donald Trump ken Chinese President Xi Jinping.
Maipalagip nga intantan ti US iti maysa a bulan ti pannakaipatungpal ti 25 a taripa iti Canada ken Mexico kalpasan a nakisarita dagiti liderda kenni Trump.
