Ipapaikkat manen ti China ti US Typhon missile launcher manipud ditoy pagilian.
Daytoy ket kasaruno iti pannakaiyakar iti armas manipud iti Laoag airfield agingga iti saan a naikeddeng a lokasion ditoy Luzon, kas maibasar ti maysa a senior PH government source idi Huwebes.
Iti maysa a press conference idiay Beijing, kinuna ti pannakangiwat ti Chinese Foreign Ministry a ni Mao Ning a ti gobiernoda ket mangdagdagadag manen iti Pilipinas a dumngeg iti awag manipud kadagiti regional countries ken dagiti tattao ti pagilian a mangilinteg iti di umiso iti kabiitan a panawen, kasta met ti panangikkat ti typhon missile system kas naikari iti publiko.
Segun iti opisial ti China, gapu iti pannakaipakat dagiti US Typhon missile launchers iti rehion, mangparparnuay ti PH iti tension ken riri agraman ti geopolitical confrontation ken arms race.
Binabalaw pay ni Mao ti US gapu iti maipagarup a pannakibiangna kadagiti isyu iti baybay kadagiti mapagsusupiatan a teritorio.
Kasaruno daytoy ti nabiit a palawag ni US Secretary of State Marco Rubio a mangpatibker iti ironclad commitment ti administrasion ni Trump ditoy Pilipinas iti baet ti napeggad nga aramid ti China kadagiti mapagsusupiatan a kabaybayan.
