Nagpakdaar ti Ministry of Defense ti China para kadagiti posible a pagbanagan mainaig iti inawagan da kas probokasyon ti Pilipinas idiay Ayungin Shoal a paset ti West Philippine Sea.
Segun kenni Chinese defense spokesperson Senior Colonel Zhang Xiaogang, rumbeng nga isardengen a dagos ti Pilipinas dagiti aksyon na iti nasao a kabaybayan nu saan ket agdusa ti pagilian kadagiti “consequences.”
Impaganetget daitoy a ti Ayungin Shoal, nga aw-awagan ti China kas Ren’ai Jiao a paset ti Nansha Qundao ti pagilian da, ket maysa a nataud a teritoryo manipud kadagiti nagkauna a Tsino isu a lehitimo para kadagiti barko da iti mangisayangkat ti operasyon agsipud ta sakop met daitoy iti hurisdiksyon da.
Ti waragawag ti opisyal ket kasaruno ti damag a panagasideg dagiti babassit a Navy boats ti Pilipinas manipud sadiay BRP Sierra Madre kadagiti barko ti China Coast Guard (CCG) babaen iti napeggad a panagmaniobra.
Kinuna ti Chinese ministry nga adu a barko ti China ti nagdidikket iti lugar ken sumagmamano kadagitoy ket arig na armado pay.
Iti agdama ket awan pay ti sungbat dagiti maseknan ditoy Pilipinas iti kabaroan manen a waragawag ti China ngem immun-unan nga impaganetget ti Philippine Navy a saan a rason ti pannakaalarma ti nasaripatpatan a tugboat asideg ti BRP Sierra Madre.
Mainaig iti dayta ket inlawlawag iti Philippine Navy a sagsaganaan da laeng ti posible a panangguyod dagiti Chinese Vessels iti nakasadsad a BRP Sierra Madre paadayo idiay Ayungin Shoal.
