Nagpanawagan ni Chinese Ambassador Huang Xilian ditoy Pilipinas ken China para ti maysa manen a dialogo ken tapno mangngegan ti kiddaw dagiti umili a pilien ti kooperasyon imbes a tensyon.
Ti panawagan ni Huang ket kasaruno ti panagrambak ti maika-50 nga anibersaryo ti diplomatiko a relasyon ti dua a pagilian idi aldaw ti Sabado, Hunyo 7.
Dimmar-ay iti okasyon da Presidente Ferdinand Marcos Jr., dagiti senador, business leaders, ken mangibagi ti Filipino-Chinese community.
Nupay kasta, saan latta bigbigbigen ti China iti 2016 arbitral ruling a pimmabor ti Pilipinas ket maulit-ulit a daras da latta a mangab-abuso kadagiti mangngalap a Pilipino idiay West Philippine Sea (WPS).
Babaen ti administrasyon ni Marcos Jr., nagbalin a natiker ken bulgar ti tignay ti Pilipinas iti panangdepensa ti soberanya bayat nga agtultuloy met ti presensya dagiti barko ti China ken panagusar kadagiti water cannons kontra kadagiti Pilipino a mangngalap.
Impaganetget ni Huang a ti Pilipinas ken China ket agkaarruba a saan a mabalin a mapagsina. Mangnamama met ti China iti ad-adu a Pilipino a makipamaysa a mapirmis ti relasyon ti dua a pagilian.
Kabayatanna, kinuwestiyon met ni Defense Secretary Gilberto Teodoro Jr. ti panagbalin nga umiso ti China para ti diálogo, kasaruno ti militarisasyon da iti mapagsusupiatan a teritoryo.
