BR LA UNION – Nangidatag ti reklamo ni Criminal Investigation and Detection Group (CIDG) chief Police Brigadier General Nicolas Torre III kontra kenni sigud a President Rodrigo Duterte.
Adda pakainaiganna daytoy iti inaramid a pangta ti sigud a Presidente a patayen dagiti senador.
Segun kenni Torre, iti kaso nga inciting to sedition ken unlawful utterance nga adda kaibatuganna a pannusa iti Revised Penal Code ket naidatag idiay Department of Justice.
Kinuna ni Torre a ti tarigagay ti sigud a presidente a patayen dagiti 15 a senador ken kayat na a bombaen ket sagudayen iti Department of Circular 20 para iti case build-up.
Nakailanad iti DC a ti reklamo a naidatag kadagiti prosecutors ket maipasidong iti “case build-up” sakbay a marugyan ti preliminary investigation.
Impaganetget ti CIDG chief a ti nasao a waragawag ket saan a rumbeng a makonsintir ken saan a mabalin nga aramiden nga angaw ti pammapatay.
Maipalagip nga idi Huwebes iti proclamation rally ti PDP Laban ti sigud a Presidente, ket imbaga na a patayenna amin a senador tapno masiguro amin a pambato iti bukod na a partido.
