Inarestar ti Criminal Investigation and Detection Group (CIDG) ti maysa kadagiti kasabwat da sigud a presidential spokesperson Harry Roque ken Cassandra Ong para ti kaso a qualified trafficking in persons babaen ti operasyon sadiay Mabalacat City, Pampanga.
Iti waragawag manipud CIDG, nabigbig ti suspek iti alias “Marlon” a natiliw babaen ti entrapment operation idiay Barangay Tabun idi Mayo 22.
Ni Marlon ti operations officer ti security agency nga aktibo a nag-operate iti mapaspasamak a trafficking iti Lucky South 99 Outsourcing Incorporated, maysa a Philippine offshore gaming operator (POGO) idiay Porac, Pampanga.
Malaksid iti baro a pannakarestar, adda pay ti agur-uray a warrant of arrest ni Marlon para kadagiti 10 counts of qualified trafficking in persons manipud idiay Regional Trial Court Branch 118 Angeles City; awan met ti nairekomendar a piyansa para ti nasao a kaso.
Segun kenni CIDG chief Police Major General Nicolas Torre III, pammaneknek daitoy nga awan sarday ti panagsukimat ken panangibalud da kadagiti wanted a karaman kadagiti heinous crimes tapno magun-od ti hustisya para kadagiti biktima.
Inallukoy met ti opisyal dagiti nabatbati pay a 50 co-accused nga agsurrender dan bayat nga agtultuloy ti panagsukimat kadakuada dagiti Tracker Teams.
Ni Roque ken ti dadduma pay ket addaan ti warrant of arrest mainaig kadagiti ilegal nga aktibidad iti uneg ti Lucky South 99 POGO hub. Naipaulog ti warrant kenkuana ti kapada a korte sadiay Angeles City, Pampanga.
Kabayatanna, nainget met a pinaglibakan ni Roque dagiti akusasyon ken kinuna a saan isuna a nagbalin a legal counsel ti aniaman nga ilegal a POGO, karamanan ditan ti Lucky South 99. Innayon na pay a kinadwaan na laeng ni Ong para ti maysa a panagtataripnong agsipud ta pagarupen na a biktima daitoy iti estafa.
Iti agdama ket kumidkiddaw ni Attorney Harry Roque ti asylum idiay The Netherlands.
