BR LA UNION – Rumbeng nga ituloy ti Commission on Audit (COA) iti panangtingiting iti posible a pannakaipila ti kaso kriminal kontra kadagiti opisyal ti gobierno a karaman iti maipagarop nga anomalya iti panaggastos ti confidential ken intelligence funds ti Office of the Vice President (OVP).
Segun ken ni sigud a COA Commissioner Heidi Mendoza, rumbeng a kitaen ti komisyon ti panangipila iti kaso kriminal ken saan a limitaran iti panangipaulog laeng kadagiti notice of disallowance.
Daytoy ti imbaga ni Mendoza bayat ti panangtalantan ti Senate Impeachment Court iti mapapati nga anomalous use of confidential funds nga agdagup ti P612 million ni Bise Presidente Sara Duterte.
Karaman iti daytoy a gatad ti P125 milyon a naipadamag a nabusbos iti las-ud laeng ti 11 nga aldaw.
Segun kenni Mendoza, saan koma nga agpatingga ti isyu iti impeachment ken saan met a rumbeng nga agpatingga iti panagkulekta ti kuwarta iti notice of disallowance.
No saan a maaramid daytoy kunana, masapul a marebisar dagiti pagannurotan, agsipudta nalawag nga adda dagiti giwang iti proseso.
SInubliyanan ti sigud a COA commissioner ti pannakairaman ti sumagmamano nga indibidual iti isyu mainaig kadagiti kompidensiyal a pondo.
Kinunana a dagiti non-impeachable officials ket rumbeng a dagus a maidarum idiay Ombudsman no adda umdas a rason wenno basaran ti kaso.
