Naitabonen ni Coast Guard Petty Officer Third Class (PO3) Ponciano Nisperos Jr. idiay Forest Lake, Cemetery, San Juan, La Union, idi September 14, 2023.
Ni PO3 Nisperos Jr. ket pimmusay kabayatan ti rescue operation idiay Halog East Tubao, La Union idi Setiembre 5, 2023.
Kabayatan ti interment, naipaayan daytoy iti funeral honors kas paset ti tradision ti Philippine Coast Guard.
Nakipaset iti pannakaipaay ti pammadayaw kenni PO3 Nisperos Jr. dagiti opisiales, enlisted personnel ken sibilian nga empleado ti Coast Guard District North Western Luzon (CGDNWLZN) kasta metten ti pamilia ken gagayyem ti pimmusay a banuar.
Nakupin ti bandera ti Pilipinas ken naiyawat kadagiti honor guards ken kalpasanna ket naipaima iti asawa ni PO3 Nisperos Jr.
Naminsan pay ket impeksa ni CG Capt. Ivan E. Roldan kadwana dagiti personnel ti CGDNWLZN ti pannakipagladingitda iti pamilia ti pimmusay a banuar.
Saludo ti Philippine Coast Guard iti impakina a dedikasion ken serbisio.
Maipalagip a kabayatan ti rescue operation idi Setiembre 5 idiay Tubao, La Union ket kabayatan nga isimsimpa ni PO3 Nisperos Jr. ti safety line ket napukawna ti balansena isunga nga naiyanod daytoy iti napegges a danum iti karayan.
Kabayatan ti lamayna, personal a bimmista ken simmaludo kenkuana ni PCG Commandant, CG Admiral Artemio M. Abu.
