BR LA UNION – Pormal a maipasidong iti General Court Martial ni Colonel Audie Mongao kalpasan a makitaan ti naan-anay a basaran iti report nga imbabawi na ti suporta na kenni President Ferdinand Bongbong Marcos Jr.
Iti maysa a press conference ita nga aldaw ti Lunes, kinumpirma ni Philippine Army Chief Lieutenant General Antonio Nafarrete a sumango ni Mongao iti kaso a panaglabsing iti Article 63 wenno Disrespect toward the President, Vice-President, National Assembly under the Articles of War.
Segun kenni Nafarrete, nalpasen ti imbestigasyon iti Training Command ken mabuk-bukelen iti komite para iti panagusig.
Innayon pay ti heneral, a nalawag iti nagbalin nga addang ni Mongao ket kaawan ti panangrespeto iti Articles of War.
Maipalagip a naikkat ni Mongao kas commander ti Training Support Group kalpasan a nagwaras iti social media ti inwaragawag na a withdrawal of support iti Presidente.
Ni Mongao ket maibilang a senior officer, a nasurok tallo dekada nan iti serbisyo iti Philippine Army.
