BR LA UNION – Sinuspinde ti Commission on Elections (Comelec) iti proklamasyon ti Duterte Youth ken Bagong Henerasyon party-lists gapu iti nakapenpen a petisyon para iti diskwalipikasyon dagitoy.
Maibasar iti resolusyon ti National Board of Canvassers, “seryoso iti alegasyon” a panaglabsing iti linteg a naidatag kontra iti dua a party-list.
Maipalagip a dagiti petisyon kontra Duterte Youth ket indatag da Reeva Magtalas ken dadduma pay idi Mayo 15, bayat a ti Youth Advocates for Climate Action Philippines kadwa ti student regents ti PUP ken UP ket naidatag idi Mayo 8, idinto a maysa nga abogado a ni Russel Stanley Geronimo iti nangidatag ti kaso kontra Bagong Henerasyon.
Nainget a kinontra ti Duterte Youth iti suspensyon ket inawagan da daytoy a “grave abuse of discretion.” Nagballaag pay ti chairman da a ni Ronald Cardema nga ibutaktak da iti maipagarop a kinakusit iti Comelec ken Kongreso nu saan da a pagtugawen.
Kabayatanna, imbaga ti Bagong Henerasyon nga awan ti naawat da nga abiso seknan iti kaso ken nagpanawagan da iti Comelec nga ituloy iti proklamasyon kas mangibagi iti nasurok 319,000 a botante.
Naamwan a nakagun-od ti 5.6% a botos iti Duterte Youth, kaibatugan ti tallo a puwesto idiay Kongreso, bayat a ti maysa pay a puwesto ket naala ti Bagong Henerasyon kalpasan a nakagun-od ti 0.8% a botos.
