Maysa a mammanday-linteg ti mangitantandudo iti kaadda ti komprehensibo a health insurance para kadagiti mannursuro iti public school ken tinawen a P7,000 a medical allowance para iti pannakausar ti nasao a benepisio.
Insingasing ni Bicol Saro Partylist Representative Brian Raymund Yamsuan ti House Bill No. 10990 a panggep a planuen ti Department of Education ti mangipaay iti health maintenance organization-type coverage kadagiti mannursuro manipud kadagiti pampubliko a pagadalan.
Agarup maysa a milion a public school teachers iti basic education system ti mabenepisyaran apaman nga agbalin a naan-anay a linteg ti nadakamat a singasing.
Segun ken ni Yamsuan, ti panggepna a panangipila iti nasao a gakat ket tapno masigurado ti kaadda ti nalawlawa a benepisio iti salun-at para kadagiti public school teachers ken agbalin a permanente a paset ti benepisioda.
Dinayaw ni Yamsuan ni DepEd Secretary Sonny Angara iti panangtedna iti P7,000 medical allowance kadagiti mannursuro iti public school mangrugi inton sumaruno a tawen 2025.
