LA UNION – Mangnamnama iti lider ti House Quad Committee a saan a patgan ti Korte Suprema iti kidkiddawen ti kampo ni Cassandra Ong kontra iti panagdar-ay na iti hearing ti komite.
Maipalagip a nangidatag ti petition for certiorari iti legal team ni Cassandra Ong idiay Supreme Court tapno kumiddaw ti proteksyon kontra iti maipagarop a pressure, impluwensya, panangpa-bain, panagpangta, verbal ken mental abuse a mapas-pasaran ni Ong iti panagdengngeg ti Kamara ken Senado.
Mangnamnama ni Surigao del Norte 2nd district Rep. Robert Ace Barbers a pagkedkedan ti Korte Suprema iti petisyon ti kampo ni Ong tapno saan nga agsardeng iti maisay-sayangkat nga imbestigasyon.
Kinunana a tarigagay ti Kamara nga agtul-tuloy iti imbestigasyon tapno naan-anay a rumuar ti kinapudno seknan iti possible a pakainaigan ni Ong iti POGO a sigud a rinaut dagiti otoridad.
Imbaga ni Barbers, nu maki-tinnulong koma laeng ni Ong ket posible a saan a marigatan kadagiti salodsod dagiti mammanday linteg.
Salodsod ni Barbers, nu sadino a paset ti panagdengngeg a nakapadas ni Ong ti panangpa-bain?
Ni Ong ket kadwa ni Shiela Guo a naarestar idiay Indonesia ken napasubli da ditoy Pilipinas.
Iti agdama, naka-detain ni Ong idiay Kamara tapno iserbi ti 30 nga aldaw a naipataw a detention na.
