LA UNION – Inarestar ti San Fernando City Police ken La Union Police Intelligence Unit iti maysa a 27-anyos a construction worker gaputi panagikot iti iligal a droga ken paltog.
Babaen iti bileg ti search warrant, sinukisok dagiti otoridad iti pagnanaedan ti suspek a managan Alfie Palisoc idiay Barangay Pagdalagan Norte, San Fernando City, La Union.
Nagresulta daytoy iti pannaka-kumpiskar dagiti otoridad iti maysa nga sling bag a naglaun ti maipagarop a napagango a bulong ti marijuana a naikabil iti walo a transparent plastic sachet ken maysa a dackel a plastic pack, agdagsen amin ti 50 a gramo ken addaan ti DDB value a P6,000.
Kinumpiskar pay dagiti otoridad manipud iti ikot ti suspek iti maysa a 38 caliber pistol ken lima a bala ti paltog.
Naidatagan ti suspek iti kaso a panaglabsing iti Comprehensive Dangerous Drugs Act of 2002 (R.A. 9165) ken Comprehensive Firearms and Ammunition Regulation Act (R.A. 10591).
Kabayatanna, maipagarop nga inaklon ti suspek nga user ngem pinaglibakan na a kukua na dagiti nakumpiskar a droga.
