BR LA UNION – Imbabawin ti House quad-committee (quad-comm) iti contempt ken detention orders a naidatag kontra kenni sigud a Presidential spokesperson Harry Roque, asawa na a ni Mylah ken ni sigud a presidential adviser Michael Yang.
Idi rabii ti Lunes, Hunyo 9, opisyal a tinurpos ti special joint panel iti 11-bulan nga imbestigasyon in aid of legislation.
Karaman a naibabawin ti contempt ken detention order na, da Police Colonel Hector Grijaldo ken Senior Police Officer 4 (SPO4) Arthur Narsolis.
Immunan nga impanawagan ni Abang Lingkod Party-list Rep. Joseph Stephen Paduano, maysa kadagiti uppat a co-chairmen ti quad-comm, nga ikkaten iti contempt ken detention order ni Roque ken dadduma pay, banag nga inaprubaran met ni Quad-Comm overall chairman, Surigao del Norte 2nd district Rep. Robert Ace Barbers.
Nabukel ti quad-comm tapno duktalen ti pakainaigan wenno koneksiyon iti Philippine Offshore Gaming Operators (POGO), extrajudicial killings (EJKs), money-laundering, illegal drugs, ken nadara a war on drugs ni sigud a Presidente Rodrigo Duterte.
Namin-dua a daras a ki-nontempt ti Quad Comm ni Roque, immuna idi nagulbod maipapan kenni Cassandra Ong, maysa a POGO representative, ken maikadwa idi napaay a makaisumite iti dokumento nga adda pakainaiganna iti kellaat ken saan a makapapati a panagdackel ti kinabaknang ti pamilya na.
Sipud idi napan a tawen ket pimmanawen ditoy pagilian ni Roque ket ita kumidkiddaw ti asylum idiay The Netherlands.
