Ti contempt order a naipaulog kontra kenni sigud a presidential spokesperson Harry Roque ket pammaneknek a saan nga ikkan ti Kamara ti siasinoman uray kadagiti dati a miembro iti special treatment.
Daitoy ti statement da House committee on dangerous drugs panel chairperson Ace Barbers ken House committee on public order and safety chairperson Dan Fernandez kalpasan nga imbaga ni Roque a saan a patas ti panag-cite for contempt ken panag-detene kenkuana iti 24 oras.
Sumangsango ni Roque iti scrutiny gapu iti maipagarup nga koneksyon na kas abogado ti maysa a POGO firm, nga ibilang na kas honest mistake idi inrasonna a ti House probe ket naigiddan iti court hearing a masapul nga atendaranna.
Iti sabali a bangir, kinuna ni Barbers a kanayon a based on merit ti pannakaipaulog dagiti contempt orders.
Kabayatan ti panagdengngeg idi Agosto 22, pinagduaduaan met dagiti mammanday-linteg ti dakkel a panagngato ti assets ti Biancham Holdings and Trading a kukua ni Roque manipud iti P125,000 idi 2014, P3.125 million idi 2015, ken P67.7 million idi 2018.
Kinuna ni Roque a daytoy ket gapu iti panangilako ti pamiliana ti ekta-ektaria a loteda sadiay Parañaque.
Nupay kasta, saan a kumbinsido dagiti mammanday-linteg ket binilinda ni Roque nga isubmitirna ti Statement of Assets, Liabilities and Net Worth-na, kasta met ti Income Tax Return a mapagsasaritaan inton sumaruno manen nga hearing.
