BR LA UNION – Nakatuding a lapdan ti gobyerno ti Pilipinas iti indatag nga asylum request ni sigud a Presidential Spokes Atty. Harry Roque idiay The Netherlands.
Segun iti Department of Justice , apaman a maiyisyu ti arrest warrant kontra kenni Roque para iti kaso a human trafficking, marigatanen ni Roque iti request na nga asylum.
Indatag ti DOJ idiay Angeles City Regional Trial Court iti kaso a non-bailable qualified human trafficking ken regular human trafficking case kontra kenni Roque idi kalman.
Kabilang pay dagiti naidatagan ti kaso ket ni Cassandra Lie Ong ken dadduma pay nga indibidwal.
Ni Roque ket maipagarop nga adda partisipasyon na kas abogado iti Whirlwind Corporation ken representative ti Lucky South 99.
Daytoy iti rinaut ti PAOCC a POGO hub idiay Porac, Pampanga gaputi ilegal nga operasyon kabilang iti human trafficking.
Maipalagip nga idi Disyembre napalabas a tawen, nangidatag ni Roque ti counter-affidavit manipud United Arab Emirates kagiddan ti panangipaganetget na a saan nga agpapaay nga abogado ti Lucky South 99.
