BR LA UNION – Naalarma ti Department of Justice nga umabot iti minilyon nga indibidwal nga agus-usar ti peke a Person’s With Disability card wenno PWD ID ditoy pagilian.
Segun kenni Chief State Counsel Dennis Arvin Chan, naalarma ti departamento iti naawat na a datos manipud National Council on Disability Affairs (NCDA), nga adda iti nasurok walo a milyon a tattao iti natakwatan nga agus-usar ti peke a PWD ID ditoy Pilipinas kumpara iti 2.8-milyon a rehistrado.
Isunga mapatta-patta nga adda iti 6 a milyon a discrepancy wenno panagduma manipud iti nasao a bilang dagiti peke ken pudno a rehistrado.
Kagiddan daytoy, nagpalagip iti Department of Justice iti siasinuman a karaman wenno agus-usar ti peke a PWD Card nga adda sungsungbatan iti linteg ken mabalin a maidatagan dagitoy iti reklamo a falsification of public documents, estafa, ken graft and corruption.
Para met kadagiti negosyante, mabalin nga umasideg iti lokal a gobyerno tapno ipa-validate iti ID nu ket atapen da a peke.
