BR LA UNION – Nangipila ti Department of Justice (DOJ) iti kaso a qualified human trafficking kontra kenni sigud a presidential spokesperson Harry Roque.
Mainaig daytoy iti pannakairamanna iti operasyon ti illegal a Philippine Offshore Gaming Operators (POGO) idiay Porac, Pampanga.
Kinuna ni Justice Undersecretary Nicholas Felix Ty, dadduma pay a naidarum ket isuda Cassandra Ong, Wu Duanren ti Whirlwind Corporation, Dennis Cunanan ken 30 pay.
Innayon ni Ty a nalawag ti pannakairaman dagiti akusado iti panangusar ti institusyon para iti human trafficking.
Immuna a kinaswan ti Presidential Anti-Organized Crime Commission (PAOCC) ti Lucky South 99 authorized representative a ni Katherine Cassandra Li Ong ken dadduma pay.
Nairaman met ni Roque iti supplemental complaint a naipila idi Oktubre 2024.
Impaganetget ni Ty nga uray abogado ti Whirlwind ni Roque, personal a nagturong daytoy iti Philippine Amusement Gaming Corporation (PAGCOR) para iti renewal ti application ti Lucky South 99.
