Nagdepensa ti flood control contractor a QM Builders ti panagdengngeg ti Senate Blue Ribbon Committee mainaig kadagiti maanamolya a flood control projects ditoy Pilipinas.
Iti nasao a panagdengngeg ket nangiruar ni Senate Committee on Finance Chairman Senador Sherwin Gatchalian iti financial statement dagiti contractors a nakagun-od kadagiti kadadakkelan a kontrata ti gobierno, ken immuna nga impakita na ket datos manipud ti QM Builders.
Dagitoy a nasao a contractors ket paset ti listaan dagiti immunan nga inruar ni Presidente Ferdinand “Bongbong” Marcos Junior a nakagun-od kadagiti dadakkel a flood control contracts manipud pay idi tawen 2022 a nangrugi ti termino na.
Segun iti senador, binilyon a gatad ti kontrata ti imbulsa dagiti contractors idinto a negatibo wenno awan met iti nabirukan da kas maibasar iti financial statement (FS).
Pinaglibakan met ti QM Builders Proprietor a ni Allan Quirante ti kinuna ni Senador Gatchalian. Imbatad ni Quirante nga arig na palso ti imprisentar ti sendor agsipud ta saan nga agpayso a lugi iti iggem na a kompanya.
Posible kunana a ti iggem ni Sen. Gatchalian a financial statement na ket manipud iti hardware na nga naipasdek idi pay dekada nobenta. Sabali pay daitoy iti contracting firm nga iggem metlaeng ti QM Builders nga addaan ti kapasidad nga agkontrata ti agingga P40-B.
Dinamag ita dagiti senador nu kasatno a nabaelan ti bassit a kompanya nga iggem ti sole proprietor a pondoan ti binilyon a gatad dagiti flood control infrastructures.
Gapo iti daitoy ket kiniddaw dagiti senador kenni Quirante nga isubmitir dagiti financial statements na tapno masublian iti issue iti sumaruno a panagdengngeg ti Blue Ribbon Committee.
