Tinakderan ni Agriculture Secretary Francisco Tiu Laurel Jr. a mangipatpatungpal iti Department of Agriculture (DA) ti nainget ken patas a sistema iti proseso ti importasyon ti lames ditoy pagilian.
Iti naisayangkat a panagdingeg idiay Kamara idi kallabes, imbutaktak ni Laurel a maipagarop a pinilit isuna ni Ako Bicol Representative Zaldy Co nga ikkan ti fish import allocation dagiti tallo a kompaniya pakairaman iti ZC Victory Fishing Corp. Banag a pinagkedkedan na ken impasigurado nga iti proseso ti DA ket agtalinaed nga obhetibo.
Impaganetget ti sekretaryo nga awan ti sinoman nga indibidual wenno kompaniya iti pabpaboran ti ahensiya no maipanggep kadagiti saritaan ti importasyon agsipudta amin nga aplikasion ket dumaldalan ti nainget a panagamiris ken awan ti personal nga impluwensya iti makaap-apektar kadagiti desisyon.
Nakabasar iti datos wenno data-driven iti proseso nga ipatpatungpal ti DA isu a patas daytoy ken awan ti pabpaboran na para kadagiti amin nga aplikante.
Inlawlawag pay ni Laurel a saan met a pabpaboran ti ahensia iti Trans-Pacific Journey Fishing Corp. (TPJ), maysa a kompanya a kukua ti pamilya ni Navotas Representative Toby Tiangco ken nalatak kas maysa kadagiti kangrunaan nga importer ti galunggong iti pagilian.
Nabayagen a mangun-una iti industriya iti nasao a kompania, ken napasamak pay daytoy idi napalabas nga administrasyon – nga iti kayat na a satuen ket bunga ti bukod a panagregget ken saan a gapo iti aniaman a pabor manipud iti DA.###
