Agtultuloy iti panagregget ti Department of Agriculture (DA) a mangisayangkat ti audit kadagiti amin a farm-to-market roads wenno FMR iti sapasap a pagilian tapno masigurado iti integridad ken panagbalin nga epektibo dagiti proyekto.
Iti naisayangkat a budget briefing idiay Kamara, dinakamat ni Agriculture Secretary Francisco Tiu Laurel Jr. a napateg nga addang iti audit kasaruno dagiti timpuar a kontrobersiya kadagiti sumagmamano a flood control projects.
Dagitoy a kontrobersiya iti nangitonda ti pagkasapulan nga amirisen ken tingitingen dagiti dadduma pay a proyekto ti gobierno.
Idi Hulyo, nangiruar ti direktiba ti sekretaryo a mangibilbilin ti komprehensibo nga audit kadagiti amin a farm-to-market road projects a mapatta-patta wenno agdama a maar-aramid manipud idi 2021 agingana iti agdama a tawen 2025.
Innayon na pay, manamnama a maabot ti agingana katapusan ti tawen iti audit gapo iti kinaado dagiti proyekto a kasapulan nga maamiris ken no adda ti matakuatan a panagkusit wenno iregularidad ket dagos a maireport ken maipakaammo kenni Presidente Ferdinand Marcos Jr.
Kabayatanna, iti Department of Public Works and Highways (DPWH) iti kangrunaan nga implementing agency a responsable iti konstruksion ken panangmantinir dagiti FMR.###
