LA UNION – Plano ti Department of Agriculture a palawaen pay iti panagbakuna kadagiti baboy kontra African Swine Fever(ASF).
Tarigagay ti ahensya a mangisayangkat ti controlled vaccination iti dadduma pay a lugar iti Luzon ken dadduma pay a red zone idiay Visayas ken Mindanao.
Iti sidong ti inisyal a plano, mairaman iti probinsiya ti La Union, Quezon, Mindoro, North Cotabato, Sultan Kudarat, ken Cebu.
Aggapo dagiti mausar a bakuna manipud iti 150,000 dose ti anti-ASF vaccine a gatangen ti gobyerno.
Immuna a nangisayangkat ti Department of Agriculture ti anti-ASF vaccination idiay Lobo, Batangas, iti nadetermina a ground zero iti resurgence ti African Swine Fever ditoy pagilian.
Kabayatanna, tarigagay ti Department of Agriculture nga ipaay a libre ti bakuna tapno masuportaran dagiti hog raiser iti panagbangon da manipud iti epekto ti ASF, a sumagmamano a tawenen a mangap-apektar kadagiti nasao nga ayup.
