Target ti Department of Agriculture ti panangibaba ti presio ti bagas a mailaklako iti programa ti gobierno a ‘Rice-for-All’ agingga iti P38-P39 kada kilo ita a bulan.
Iti agdama, dumanon iti P40 kada kilo ti mapaglakuan iti well-milled rice iti sumagmamano a pagtagilakuan a Kadiwa stores ti Presidente idiay Metro Manila.
Karaman ditoy ti sumagmamano nga estasion ti kadiwa iti MRT-3 ken LRT-2.
Iti maysa a statement, kinuna ni DA Assistant Secretary ken spokesperson Arnel de Mesa nga agtultuloy ti miting ken konsultasyon maipapan iti kastoy a plano.
Immunan a naglako ti ahensia iti P45 kada kilo ti bagas ken idi agangay, imbabada iti P43.00 ken P42.00.
Sakbay nga agngudo ti tawen 2024, sursuroten pay laeng ti ahensia ti panangipababa ti presio dagiti mailako a bagas iti P40.00 kada kilo.
