Binabalaw ni Senador Erwin Tulfo ti panangitukon ti binilyon a gatad ti pondo para kadagiti flood control projects a maipaspasdek kadagiti probinsya a saan met a malaylayos.
Iti panagdamdamag ti mamanday-linteg kenni Department of Public Works and Highways (DPWH) Secretary Manuel Bonoan, dinakamat na a binilyon ti pondo ti intukon ti ahensya kadagiti proyekto kadagiti probinsya ti Cebu, Isabela, Albay, Leyte, Camarines Sur, ken dadduma pay nga awan met kadagiti top-10 flood-prone provinces ditoy Pilipinas.
Karaman pay ti listaan ti Pampanga, Nueva Ecija, Pangasinan, ken Tarlac, a malaylayos ngem nababbaba met ti pondo da ngem dagiti immun-una iti listaan.
Dinamag pay ni Tulfo ti Department of Budget and Management (DBM) nu apay a basta da lattan a mangir-iruar ti pondo nu daitoy ket kiddawen dagiti kongresista wenno siasinoman nga elected public officials.
Insungbat met ni DBM Secretary Amenah Pangandaman a saan nga umdas dagiti personnel ti ahensiya tapno maysa-maysaen a kitaen dagiti singasing a proyekto ti DPWH wenno amin nga ahensya ti gobierno sakbay pay a naan-anay a maipasa ti tinawen a pondo.
