Inpakaammo ni Police Information Officer Police Major Lawrence Ganuelas a mapilaan itan ti kaso nga Alarms and Scandal dagiti agtutubo a nag-rambolan iti ruar ti nalatak a bar ditoy Probinsya ti La Union, partikular idiay ili ti San Juan.
Dayta iti marching order ti Police Regional Director a ni Police Brigadier General Dindo Regis Reyes kasaruno ti tensyon a napartuat kadagiti aganay 13 nga agtutubo nga intultuloy da pay ti nagdidinnanog iti ruar ti bar a nagiinoman da.
Dagiti karaman a partido ket manipud ditoy ciudad ti San Fernando, idiay ili ti San Juan ken kakadwa da manipud kadagiti saanen a nadakamat pay a probinsya.
Gapo iti insidente ket imbilin ti Provincial Director ti La Union Police Provincial Office a ni Police Colonel Redentor Ulsano iti maximum deployment kadagiti tourist area para kadagiti bisita nu kasta ket mapagtalinaed iti ‘peace and order.’
Kinuna met ni PLTCOL ROGELIO B MIEDES a pagaammo ti San Juan kas kalatakan a destinasyon ditoy La Union a masansan ket pagtataudan pay ti nakaro a trapiko isu nga naimplementar itan ti deployment plan a nasken ket “visible” dagiti kapulisan a nalaka a maasekgan dagiti tattao.
