LA UNION – Kalpasan iti aganay maysa a dekada a panaglayag kadagiti kabaybayan ti Pilipinas ken China ket maigarahe ita ti tradisyonal wenno ti nagkauna a lugan-pangbaybay a balangay.
Sigun kenni Environment Undersecretary Arturo Valdez, Balangay Expedition Leader, a napasaranna ken dagiti 30 balangay crew a kakadduana a mapadas iti kinatured wenno pigsa ti pakinakem nga awanan ti baro nga alikamen iti panaglayag ti kabaybayan.
Naiyestoryana pay dagiti napasaran a peggad iti tengga ti baybay kas ti dakes a kasasaad ti panawen wenno dagiti masabsabatda a dadakkel a barko a mabalin a mangdalapus kadakuada.
Agyamyaman met daytoy iti Dios gapu ta naragsak ken naballigi iti panagdakiwasda iti adu a tawen babaen ti panagluganda iti balangay.
Kinumpirma ti opisyal a daytoyen iti maudi a panagdakiwas ti balangay ken mangnamanma daytoy a kadagiti sumaganad a panawen ket adda ti mangtulad kadakuada nga aglayag babaen ti panagaramat ti nasao a nagkauna a lugan pangbaybay.
Naisar-ong idiay San Fernando, La Union itattay bigat dagiti balangay a naggapu pay manipud idiay China.
