LA UNION – Kagiddan iti pammilin ni Pangulo Rodrigo Duterte iti hepe ti Philippine National Police a ni Director General Oscar
Albayalde ket impanamnama iti liderato ti La Union Police Provincial Office (LUPPO) a rugyandan ita kaddua dagiti barangay
officials nga agtiliw kadagiti tambay idiay probinsya ti La Union.
Iti pannakiuman ti Bombo Radyo La Union kenni S/Supt. Ricardo Layug Jr., Provincial Director ti LUPPO, kinunana a dakkel iti
maitulong para ti pulisya dagiti barangay officials tapno ipatungpal ti pammilin ti pangulo ken ti agraraira nga ordinansa a
mangtiliw kadagiti tambay iti lansangan kangrunaan kadagiti agiinuman wenno nakaussob.
Saan kunana a makita amin iti pulis ti mapaspasamak isu a babaen iti tulong dagiti barangay officials ket mapapartak iti
panangipatungpal iti kinaurnos kadagiti masakupan a lugar.
Gundaway metten daytoy kangrunaan kadagiti baro a nabutusan nga opisyal ti barangay nga ipakita nge isuda ket maikari a
binotosan dagiti umili.
Sigun kenni S/Supt. Layug, gapu iti pammilin ni Pangulo Duterte iti pulisya a tiliwen dagiti tambay ket maliklikan iti krimen
wenno riribok.
Gapu ta adda iti pagannurutan a maipawil kadagiti tattao nga agpakatang-katang a nakaussob ket tiliwenda met dagitoy.
No panunuten kinunana, ket saan a nasayaat a kitaen ti tao a nakaussob nga adda iti pampubliko a lugar.
Kasarita da met dagiti tambay a sumurot iti pammilin, ngem no makipinnatangken dagitoy wenno adda ti sabali pay a
panaglabsingda iti linteg kas ti panagikot iti droga wenno igam ket arestarenda dagitoy.
Kabayatanna, malaksid iti panangtiliw kadagiti tambay ket impalagip met ni S/Supt. Layug nga agtultuloy iti
panangipatungpal iti ordinansa nga addaan ti pakainaigan iti curfew hour kadagiti menor de edad idiay probinysa.
