Arigna reunion dagiti kakabagyan, gayyem ken tagasuporta ti pananglagip iti 40 days a pannakatay ni sigud a Philippine Constabulary (PC) Brigadier General Tomas Dumpit Sr. iti Blu Water Beach Resort and Parks idiay Barangay Pugo, Bauang, La Union itay kanikadua.
Iti nasao a tradisyonal a panagu-ummong nga indaulwan ti ag-asawa a retired Col. Thomas “Butch” Dumpit Jr. ken Dra. Joya Hidalgo-Dumpit ket nangisagot dagitoy ti ababa a panagkararag kasaruno ti salo-salo.
Linagip ti ag-asawa dagiti kanayon nga ibilbilin kadakuada ni Dumpit Sr. idi daytoy ket sibibiag pay a saan nga mauma a tumulong kadagiti agkasapolan nga umili.
Agpada a dinakamat da Col. Butch ken Dra. Joya Dumpit iti panagbetla nga ituloyda dagiti panagtulong ti pimmusay a heneral.
Naminsan manen a nagyaman dagitoy kadagiti umili ken gagayyem nga agtultuloy a makikaykaysa kadagiti napintas a panggep ni Dumpit Sr. a nagbalin a mangibago ti ma-ikadua a distrito ti La Union.
Ni Dumpit Sr. a naitanon iti Libingan ng mga Bayani ket pimmusay idi June 11, 2023 iti edad a 90 anyos.
