(Update) LA UNION – Nanayunan pay dagiti lugar ditoy La Union a nagdeklara nga awan klase na ita nga aldaw ti Huwebes, July 19, 2018 gaputi saan a napintas a kasasaad ti panawen.
Malaksid idiay ili ti Bauang nga immunan a nag-anunsiyo ti kanselasyon ti klase iti amin a level iti agpada a private ken public schools, simmaruno a nag-anunsiyo iti ili nga Aringay ken San Gabriel.
Idiay ili ti Bacnotan ken Caba, nasuspendi iti klase manipud pre-schools agingga Senior High School (SHS) bayat a pre-schools agingga elementary level laeng ti awan klase na idiay ili ti Agoo ken Rosario.
Kabayatanna, ditoy syudad ti San Fernando ket naiyanunsiyo nga adda serrek iti amin nga estudyante ken trabaho iti public at private offices ita nga aldaw.
Nupay kasta, naitalek kadagiti nagannak ti desisyon nu palubosan dagiti ubbing, nangruna iti pre-schools ken elementary, a sumrek iti klase nu panagkita da ket peligro ti pagbiyahe dagitoy manipud iti lugar da.
Base iti latest North Luzon Rainfall Advisory manipud PAG-ASA, iti ili ti Rosario, Sto. Tomas, Agoo, Tubao, Pugo, Aringay, Caba, Burgos, ken Naguilian ket makapasar iti kalalaingan a nu maminsan ket napigsa a buyat ti tudo.
Bayat nga iti nabatbati a paset ti La Union a pakairamanan ti City of San Fernando ket namnamaen a makapadas iti kalalaingan na laeng a tudo ita nga aldaw.
