Nangipeksa ti rikriknaen da dagiti mammallot mainaig ti gakat a Senate Bill No. 2975 wenno Revised Animal Welfare Act ni Senador Grace Poe gapo iti posible a pakairamanan ti pallot kadagiti maiparit nga aktibidad.
Segun kenni Joey Sy, beterano nga gamefowl host ken breeder, mapukawen ti nagkauna a tradisyon ken pagbiagan ti rinibu a Pilipino nu mairaman ti pallot kadagiti maipawil nga animal fights.
Pinaboran met daitoy ti co-host na a ni Eddie Boy Ochoa a nagpanawagan nga ideklara ti pallot kas paset ti national heritage ti pagilian.
Kabayatanna, impaganetget met ni Atty. Arturo De Castro, maysa a gamefowl breeder ken mammallot metlaeng nga awan iti singasing a gakat ti panangilasin ti pallot u di ket daitoy ket mabalin a mangigubuay ti “kiss of death” kadagiti politiko a mangsuporta iti daitoy.
Maipalagip nga idi Hunyo 2 ket inaprobaranen ti Senado ti maikatlo ken maudi a panagbasa ti Senate Bill 2975 a panggep a gibusenen ti animal cruelty.
Sakbayna ket inaprobaranen ti Kamara ti gakat nga House Bill 11254 a mangiparit met iti online sabong.
